TOMOHON, mejahijau.com – Wali Kota Tomohon diwakili Asisten Pemerintahan dan Kesejahteraan Rakyat Drs Oktavianus Mandagi MAP menghadiri ibadah syukur inkulturasi.
Kegiatan tersebut, dilaksanakan selesai rangkaian kegiatan Dinas Pendidikan dan Kebudayaan Daerah Kota Tomohon.
Ibadah syukur ini, dipimpin oleh Khadim Pdt Audy Sewow MTh di GMIM Kakaskasen Eben Haezer.
Sambutan Wali Kota Tomohon dibacakan oleh Asisten 1 Mandagi, bahwa torang samua musti bilang makase pa torang pe Tuhan Yesus Kristus.
Lantaran, ini hari jadi hari yang istimewa. Torang mo syukuri tu keberhasilan deng campur tangan Tuhan, dirangkaian kegiatan pemerentah kota Tomohon lebe khusus Dinas Pendidikan deng Kebudayaan Daerah.
Antara laeng, Festival deng Pagelaran Seni Budaya dalam rangka TIFF 2023, Olimpiade Sains Nasional (OSN), Olimpiade Olahraga Siswa Nasional (O2SN), Festival Lomba Seni Siswa Nasional (FLS2N) deng Gala Siswa Indonesia (GSI).
“Torang samua so sama-sama kerja keras, bakubantu, deng berkompetisi for mo hadirkan yang paling bagus for kota Tomohon,” Mandagi bilang.
Deng, beking kegiatan-kegiatan ini, torang nyanda cuma beking kuat tu torang pe Pendidikan deng Kebudayaan.
Mar, sama deng mo buka jendela for dunia kong dorang bole dapa tau tu kekayaan intelektual deng budaya yang torang kota Tomohon punya.
Festival deng pagelaran seni budaya so bawa pa torang di perjalanan yang nda mo dapa lupa, beking torang samua senang deng beking tatamba torang pe pengetahuan tentang macam-macam seni deng budaya di kota Tomohon.
Selain itu, kegiatan OSN, O2SN, FLS2N, dan GSI jadi bukti nyata yang mana torang pe generasi muda yang berbakat deng berdedikasi tinggi di macam-macam bidang ilmu, seni deng olahraga.
Di proses ini, torang so belajar tu semangat persaingan yang sehat, cara ja hargai orang laeng pe karya, deng tentang bagimana torang bole terus berkembang deng mo perbaiki torang pe diri.
“Torang samua so kase lia tu kerja keras, dedikasi, deng semangat kolaborasi yang nyanda pernah surut, biar lei di tenga tantangan deng keterbatasan,” kata Asisten 1.
So itu no, di perayaan syukur ini, kita mo kase apresiasi pa samua peserta didik, Kepala Sekolah, Guru, Pelatih, Orang tua, deng samua pihak yang so ambe bagian for kelancaran deng sampe sukses samua tu kegiatan pemerenta kota Tomohon.
“Samua ini boleh berhasil lantaran ada kerja sama deng kerja keras torang samua,” tambah Mandagi.
Torang pe Wali Kota Tomohon, so komitmen for terus mo dukung deng kase maju tu sektor pendidikan deng kebudayaan di torang pe Kota ini.
Apalagi deng torang pe bahasa Manado ini, jang somo ilang, so itu torang so musti kembangkan deng sebarkan.
Mo se sebarkan ini, somusti mulai dari torang deng ngoni guru guru deng kepala sekolah. Mari torang sama-sama mobangun masa depan yang lebe cera for torang pe generasi penerus.
“Supaya dorang bole terus mogale tu potensi kong mo se persembahkan tu prestasi yang paling bagus for kota deng bangsa ini,” tutup Mandagi.
Hadir juga, Ketua BPMJ GMIM Kakaskasen Eben Haezer Pdt Sophia Goni-Rau MTh, Kepala Dinas Pendidikan dan Kebudayaan Daerah Kota Tomohon Dr Juliana Dolvin Karwur MKes MSi.
Deng, Direktur Pusat Penerjemahan Alkitab Ibu Ayu Suwandi, Koordinator Etno Artis Mr Matt Manger, Staf Khusus Wali Kota Tomohon Fentje Goni SH.
Serta, Para Kepala Sekolah dan Jajaran Dinas Pendidikan dan Kebudayaan Daerah Kota Tomohon.(*)
